Skip to content
14/02/2010 / kjersti70

Fastelavensboller

I går bakte eg fastelavensboller, og dei har vi hatt glede av, både i går og i dag. I anledning morsdag blei det faktisk ete boller til frokost… Det får vere greit ein gong i året. Etter at vi fekk cøliaki og diabetes inn i heimen bakar eg nesten aldri søt bakst. Det er rett og slett problematisk. Sjølve bakinga går i og for seg greit, men den søte baksten er full av sukker og ikkje minst fett. Det krev nøye overvåking i mange timar etterpå. Det går heilt fint ein og anna gongen, men ikkje noko eg har lyst på mange gonger i veka 🙂

Eg tok utgangspunkt i ein god deig som eg tidlegare har hatt oppskrift på. Eg endra oppskrifta for å gjere ho noko meir blodsukkervennlig: reduserte kakemiksen, og la til eit ekstra egg og cottage cheese. Smaken var like god som før; og heile familien momsa boller. Når det er sagt; glutenfri gjærbakst bør etast same dag; den blir fort tørr og smaklaus.

1 pk. fersk gjær for søt bakst
5 dl. melk
300 gram smør eller margarin (eg brukar alltid smør)
1,5 dl cottage cheese
2 egg
150 gram Toro kakemix (denne er søt)
850 gram (ca) fin mjølmix (eg brukte raud Semper)
150 gram sukker
1 ss fiberhusk
1 ss pofiber
1 ts bakepulver
1 ts kardemomme

Smelt smør og ha i melk. Varm til 37 grader. Ha det i ein bakebolle og smuldre gjær i. La gjæren bli oppløyst. Ha i sukker, pofiber og fiberhusk. La dette stå i 10 minutt. Ha deretter i resten av ingrediensane. Elt i maskin i 10 minutt. Deigen er våt, men det gjer ingenting. La deigen stå og heve  i 30 minutt.


Strø glutenfritt mjøl på bordet (du treng ein del) og tøm deigen ut av bollen. Du treng truleg å strø godt med mjøl og elte litt. Det fine med glutenfri deig er at den er mindre elastisk, og mykje lettare å jobbe med enn ein kveitemjølsdeig. Syns eg i alle fall. Det å bake ut boller derimot, kan vere vanskelig med den vanlige teknikken – å ta ein klump deig, presse mot bordet og rulle ut ein bolle. Det går stort sett ikkje, og blir klissete. Eg tar heller ein klump deig, har godt med mjøl under og over og trykker ut ein flat, liten leiv. Deretter tar eg kantane på leiven og snurpar det mot midten, og snur alt. Endane er nå samla under bollen, og den blir ganske fin i fasongen. Lag boller på denne måten og sett på bakeplate med bakepapir. Du skulle få nok til to plater. Eg laga skillingsboller med halvparten. Dei blei gode, men såg rare ut, fordi eg hadde gløymt å ha romtemperert smør. Eg dryssa altså berre med sukker og kanel, noko som gjorde at «snurren» klistra seg fast, og det heile blei i grunn berre boller med kanel og sukker inni 😀 Dei smakte nå godt da.

La bollene heve i 30 minutt og sett på steikovnen i mellomtida. Hugs å ta ut eit egg slik at det er romtemperert før pensling. Du kan alternativt pensle med melk. Steik bollene ved 225-250 grader i 10 minutt.

La ungane slikke bollen medan de ventar 🙂

Glutenfrie boller som ikkje er ferske (dvs. meir enn eit døgn gamle, eller har vore frosne) bør lunkast forsiktig i mikro før ein et dei, ellers blir dei sørgelig tørre og rare. Fukt dei oppå og legg på eit kjøkkenpapir når du varmar dei.

Advertisements

Legg att eit svar

Fill in your details below or click an icon to log in:

WordPress.com logo

Du kommenterer no med WordPress.com-kontoen din. Logg ut / Endre )

Twitter-bilde

Du kommenterer no med Twitter-kontoen din. Logg ut / Endre )

Facebook-foto

Du kommenterer no med Facebook-kontoen din. Logg ut / Endre )

Google+ photo

Du kommenterer no med Google+-kontoen din. Logg ut / Endre )

Koplar til %s

%d bloggarar likar dette: