Pirog

Pirogar er super nistemat, turmat og snack. Ikkje spesielt sundt, med tanke på det fine brødet med mykje fett i, men betre enn mykje anna. Her er tross alt kjøt og grønsaker også! Eg har googla meg fram til ei grei oppskrift der deigen er laga på smør, melk, mjøl og salt, og meste nytte fann eg i oppskrifta til Liselotte (forøvrig ein veldig fin blog) Eg trur eg neste gong skal prøve å erstatte smøret med noko olje. Smaken av olivenolje vil passe godt med fyllet inni. Det tar littegranne tid å lage pirogar, på grunn av utbaking og bretting og diverse, men sett av litt tid og lag ein stor deig. Pirogane er nemmelig fine å fryse, og er gode i matpakken!

For å lage desse:

treng ein:

kjøtt (f.eks kjøttdeig, kjøttrestar, skinkebitar, kyllingrester el.likn, men du kan også droppe kjøtt)

grønsaker (løk, gulrot, selleri, paprika, tomat etc etc)

krydder (det du likar)

riven ost (kan utelatast)

100 gr. smelta smør

3 dl. melk

50 gr gjær

eit lite dryss salt

2 egg + 1 til pensling

350 gr. glutenfritt mjøl

Du lagar først fyllet, og tar det du  har i kjøleskapet. Eg lagde to ulike blandingar. Eg tok rester av gårsdagens kylling og steikte med løk og kvitløk, gulrot, hot madras curry pulver og masse ingefærpulver. Denne blandinga blei naturlig nok mest til oss voksne.

Den andre blandinga var av kjøttdeig, løk, kvitløk, selleri og gulrot. Grønsakene blei kutta fint opp slik at ingen hadde grunn til å protestere. Eg hadde i litt tacopulver. I begge blandingane hadde eg i litt creme fraiche for å «samle» blandinga litt

Blandingane vart satt til avkjøling medan eg lagde deigane (eg lagde to, ein glutenfri og ein med kveitemjøl i). Smøret vart smelta ei ei gryte og melka kvelt i. Når blandinga var litt meir enn fingervarm rørde eg egga inn (dei var kalde, så måtte ha litt varme i melkeblandinga). Når væska var ca. fingervarm hadde eg i gjær, salt og mjøl. Mjølet slumpa eg berre oppi til eg fekk ein grei deig. Den slapp bollen fint, men var ganske laus. Deigane satte eg til heving i eit lite kvarter medan eg rydda på kjøkkene og satte steikomnen på 200 grader.

Deretter bakte eg ut deigane. Eg tok ein klump med deig og kjevla ut (eller trykte med hendene) små leivar, om lag 10 cm. store i diameter. Den glutenfrie deigen var mykje lettare å jobbe med!

Eg la litt fyll på midten, hadde i litt riven ost, pensla langs kanten på eine halvdelen og bretta over. Langs kanten klemde eg litt til med ein gaffel.

Så fine atte! Dette skal ikkje sjå perfekt ut; når pirog’ane blir steikte blir dei fine uansett! Så pensla eg dei godt med egg.

Kjøkkenhjelper med pumpesekk på snei!

Pirogane blei steikt ved 200 grader i 15 minutt. Deretter vart dei testa, og godkjendt. Dei er gode med salat til, men meir treng ein ikkje. På grunn av det fine brødet i kombinasjon med smør, treng ein mykje insulin for dette, og kanskje ein gjentatt dose nokre timar seinare. Det er likevel lettare å justere enn pizza, som gir høgt blodsukker i mange timar etter måltidet.